Saturday, 30 November 2013

నా నేను...

నాది కాని మనస్తత్వమేదో అందరూ నాలో చూస్తుంటే
నేనో అద్దం లా మారిపోయానేమో అనిపిస్తుంది
నన్ను కదా నాలో చూడాల్సింది 
మరి మిమ్మల్ని చూసుకుంటారెందుకు
ఎవరి కళ్ళకి వారి మనసులా నే కనిపిస్తుంటే
నేనేంటో ఎవరికీ చెప్పుకోవాలి?

నా కోపం నా బాధ నా సంతోషం నా ఆనందం
అన్నీ మీవే అవును అన్నీ మీవే
నా ప్రతి చర్యా మీకు ప్రతిచర్యే
మీ కోపమే నా కోపమయ్యింది
మీ నవ్వే నా నవ్వు అయ్యింది
మీ సంతోషం నా సంతోషమయ్యింది

మీ ఊహలు నావిలా మీకనిపిస్తుంటే
నాక్కనిపించని అజ్ఞాతపు నీడ
నాలో ఉందేమో అని తరచి తరచి చూస్తూ
ఎక్కడ నేను మీ నీడగా మారిపోతానో
నాలో నుండి నేను మాయమవుతానేమో
అన్న ఓ భ్రమ నాలో కదలాడుతుంది

అందుకే ఈ తపన
ఈ లోకానికి నేను తెలియాలని
నన్ను నాలా ఆవిష్కరించుకోవాలని ఉంది
నేనెప్పుడూ నాలానే ఉంటున్నా
నన్ను నన్ను గా తెలుసుకోవాలంటే
నీ మనసో తెల్లకాగితం అవ్వాలి

0 comments:

Post a Comment