Tuesday, 3 June 2014

నా స్నేహమా...

ఓ నా స్నేహమా...

జీవితపు ప్రతి మలుపులోనూ ఎందరో పరిచయస్తులు... కొందరు హితులవుతారు ఇంకొందరు స్నేహితులవుతారు... మరి కొందరు మన జీవితమే అవుతారు.

ఏంతో మంది తమ పరిచయస్తులనే స్నేహితులు అని భావించేస్తూ ఉంటారు... కానీ పరిచయస్తులు అందరూ స్నేహితులు కాలేరు అన్న నిజం తెలుసుకున్న రోజున ఆ నిజాన్ని జీర్ణించుకోలేరు. అందుకే నా జీవితం లో చాలా మంది పరిచయస్తుల్లాగానే మిగిలిపోతూ ఉంటారు. అతి కొద్ది మంది స్నేహితులయ్యారు.

మరి ఇదేమిటో కొత్తగా...

నీ పరిచయం నాకు నన్ను పరిచయం చేసింది...! నాలోని నిజమైన నన్ను వెలుపలికి తీసింది...!
కేవలం పరిచయం మాత్రమే కదా ఎప్పుడూ పలకరింపులెందుకూ అనుకుంటూ ఉంటుంటే... మనసెందుకో ఊరుకోవటం లేదు... నిన్ను నీకు పరిచయం చేసిన వ్యక్తితో నీకుంది కేవలం పరిచయమేనా? స్నేహం లేదా? అని ప్రశ్నిస్తూ ఉంది.

నాకున్న నిజమైన స్నేహం నువ్వేనని నాకు అర్ధం అయ్యింది.

ప్రేమలో ఎదురు చూపులుంటాయని తెలుసు కానీ... స్నేహితులతో మాట్లాడటానికి కూడా మనసు తహ తహ లాడుతుంది అని నీ స్నేహం పొందాకే తెలిసింది.

నీతో మాట్లాడే ప్రతీక్షణం నా తప్పొప్పులు అన్నీ అద్దం లో కనిపించినంత స్పష్టంగా నాకు తెలుస్తూ ఉన్నాయి. నేను ఏం చెయ్యగలనో... ఏమి చెయ్యాలో... ఎలా బతకాలో అన్నీ చాలా స్పష్టం గా కళ్ళకు కట్టినట్లుగా అర్ధం అవుతుంది. పిరికి మనసుని సమాధి చేసి మొమాటపు నవ్వుల్ని తుడిచేసి బతుకుతున్నాను అంటే అదంతా నీ స్నేహపు గొప్పతనమే...ఒక్కోసారి గల గలా మాట్లాడతావు... మరో సారి అర్ధాంతరంగా ఆపేస్తావు...

అలా అలా మాట్లాడుతూ అర్ధాంతరంగా ఆపేసిన నీ మాటల వెనక నిశ్శబ్ద అర్ధాలు ఏ నిఘంటువుల్లో వెదకాలి?
ఎన్ని నిఘంటువులు వెదకినా నీ గురించి నేను చదవబోయే అర్ధం ఒక్కటే... నువ్వంటే ‘స్నేహం’ అని.

నీ

స్నేహితుడు.

0 comments:

Post a Comment