Saturday, 2 May 2015

'తను' ఎక్కడ?

మనిషికీ మనిషికీ మధ్య దూరాన్ని 
యంత్రాలు వాయు వేగంతో కరిగిస్తుంటే 
మనసుకీ మనసుకీ మధ్య పెరుగుతున్న దూరంలో ఒక జీవితం...
రాలిపోదామా  సాగిపోదామా అన్నట్లుగా...

చిత్రాతి చిత్రంగా సమ్ముఖాల ఆలింగనంలో 
ఏకశయ్యపై  సమాంతరంగా పరిగెడుతున్న 
విముఖాల పందెంలో మరో జీవితం 
వీడి పోదామా ఉండిపోదామా  అనుకుంటూ...

కాలంతో పందేమేసి కోరికల మెడలు వంచిన మనిషిని 
కమ్ముకున్న ఒంటరితనాన్ని అంటిపెట్టుకుని 
కను రెప్పల తడిలో ఈదుతూ ఇంకో జీవితం 
మునిగిపోదామా ముందుకు పోదామా అనుకుంటూ 

కను రెప్పల కౌగలింతలో కలగా పలకరించటానికీ మొహమాటమెక్కిన 
జీవితపు వాస్తవ స్పర్శ  నన్ను తడుముతుంటే 
జీవితం తనకి తానుగా ఒదిగిన తావుని గట్టిగా పట్టేసుకోవాలని ఉంది. 
ఇంతకూ ఆ తావెక్కడ? ఆ 'తను' ఎక్కడ? 


0 comments:

Post a Comment