Friday, 7 August 2015

ఎడారి

ఎదగని నిన్ను ఎరిగిన దానికై
కొత్త వెతుకులాట మొదలెట్టాలి 
వింతలెన్నో బయటపడుతున్నచోట
నీకు నువ్వు ఆశ్చర్యం అవుతుండాలి 

గుండె కడలిగా మారదూ
ఎరి(ది)గిన దారొకటి ఎడారిగా కనిపిస్తే  
మనసు మైదానం బీడు వారదూ
శూన్యమొకటి వరదైతే

అప్పుడప్పుడూ గుండె వర్షించాలి 
నరాలకి అంటిన రాతి పొరలని కరిగించే అంతగా... 
అప్పుడప్పుడూ ఎడారిగా  మారాలి 
నీలో ఉన్న ఒయాసిస్ వెలికి రావటానికై 

నీకు నువ్వు ఎడారైన క్షణం 
ఎదురవ్వగా లేనిది
నీకు నువ్వే ఒయాసిస్సువై 
సేద తీర్చుకోలేవూ 

శూన్యం శూన్యమవ్వదూ
నీకు నువ్వు వరంగా మారితే...  
ఊపిరొకటి ఉప్పెనవ్వదూ
నువ్వొక నిజమై నడిచొస్తే

1 comments:

మీ భావలహరికి ఇదో మచ్చుతునక. భళారే భళి

Post a Comment