Sunday, 5 June 2016

తేజం



ప్రతి నేనుకూ ఒక్క నువ్వే
అయిన తన్మయత్వంలో
మేలి ముసుగుని
కప్పుకున్న నిత్యతేజస్సువి

నీ మాటనొక భగవద్గీతగా
మలచుకున్న దారిలో
నిత్య పారాయణమైన
సంకల్పపు కొనసాగింపువి

ప్రతి ఒక్కరికీ ఒక్కరే స్వార్ధమవుతారు
అందరి స్వార్ధమూ
ఒకరే అయితే అది దైవత్వమేగా
మరి అది  నీ సొంతమేగా

నువ్వు పరిచయమైన కాలపు అణువే
ఇప్పుడీ మనసున ఒక బ్రహ్మాండమై
ఒక చిన్న చిరునవ్వుని
నా పెదవులపై శాశ్వతాభరణం చేసేసింది

ఈ చిన్ని గుండెచప్పుడొకటి చాలు కదూ
నువ్వొక లోలకమై
నా లోకాన్ని సుగంధించడానికి
విశ్వమోహనమై హత్తుకుపోవడానికి

- 04.06.16

0 comments:

Post a Comment