Sunday, 17 July 2016

నిప్పుకణిక



ఎంతటి సముద్రమూ
ఒక్క చుక్కతోనే మొదలై ఉంటుందన్న
సత్యాన్ని అలవాటుగా పక్కకి నెట్టేసి
జ్ఞానాల లెక్కల తర్కాలలో
మేథావులంతా తకరారు అవుతుంటే
దేన్నీ చివరికంటూ చూసిన
ఆనవాలేదీ దొరకని లోకాన
ఎటుతవ్వినా
ఎడతెగని సిద్ధాంతాల
మంజూషాలే బయల్పడుతున్నాయ్

ఇటు చూస్తే, తీరాలు మాయమైపోయి
లంగరు వేయడానికి నేల తగలక
తెరచాపని ఏమిచేసుకోవాలో
చేరాల్సిన గమనమేదో
అంతుతెలియని నావికుడిగా
మనిషి ఒక ఒంటరి అంకెలా
మారిపోయిన ఘడియలు
కొనసాగుతూనే ఉన్నాయ్

ఇప్పుడు గొంతు విప్పి చూడు
కోట్ల గొంతుకలు మౌనంగా ఉన్నప్పుడు
గొంతు విప్పి చూడు
నీ శబ్దం
ప్రతి ధ్వనిస్తూనే ఉంటుంది అప్రతిహతంగా
అగ్ని ధనుస్సువైతేనే
నిప్పుకణికని సంధించవచ్చన్న నిజంగా నువ్వు మారటం
ఒక కొత్త జననాన్ని పరిచయం చెయ్యటమే


0 comments:

Post a Comment