Thursday, 18 August 2016

కష్టం


దాహం తెచ్చిన మెలకువలో
మెలకువ రాసే దాహంలో
విశ్రాంతి ఎరుగని దేహాలు కొన్ని
ఎండ స్నానంలో పునీతమై
కప్పుకున్న స్వేద వస్త్రాలెంత పవిత్రమో
పుడమికే తెలుసనుకుంటా
చెమటచుక్కకే దాసోహమంటుంది

ఎదగాలి… ఎదగాలి అనుకున్న ప్రతి వాడికీ
శక్తి ఎదురవ్వటం కష్టమేమీ కాదు
ఎదగాలన్న ఆరాటానికి నరాల్లోని పోరాటం తోడైతే
లేదంటే
ప్రతి కలా ఎండమావుల ప్రతీకలా
కళ్లపై ఎడారి దుమ్ముని పేర్చేస్తుంది

కష్టం కమనీయమైన చోటే
సుఖం మొలకెత్తుతుంది
అమరత్వం పొందిన ప్రతి క్షణం
కష్టం చెక్కిన కాలపు శిల్పమేనన్న
నిజం తెలిసిన వ్యక్తిత్వాలు కొన్ని
పోగుపడితే చాలదూ
దిగంతాలు దద్దరిల్లేలా
గమ్యపు శబ్దం ప్రతి ధ్వనిస్తూనే ఉండటానికి
నరాల్లో నెత్తురు విజయనాదం చెయ్యటానికి


0 comments:

Post a Comment