Monday, 4 February 2019

ఆత్మధ్వని

తన ఆత్మధ్వని చుట్టూ ఆవరించుకున్న
అలౌకిక నిశ్చలతలో
మమేకమైన చలనాలన్నిటికీ చలువ పందిళ్లు వేసి
తానొక ద్వీపంగా
ఎంత సౌందర్యాన్ని రాసేసుకుందో చూడు
ఈ నిశ్శబ్దం…  

మృదువుగా చిక్కుబడిన ఏకాంతంతో తర్కిస్తూ  
అడుగు కదపని ప్రయాణంలో  
కాసేపలా తనలోకి నడవడం
ఒక దివ్యత్వపు యాత్రను చేపట్టడంలాంటిదే

నీకోసం నువ్వు రాసుకున్న కల మొత్తం
తనకు తెలుసన్నట్లుగా
నిన్ను వెచ్చబెట్టడానికి
తనలో మెరుపుల కొలిమిని సిద్ధం చేసి ఉంచుతుంది

ఇదిగో…
ఇలా నిన్ను నువ్వు గెలుచుకుని
లోలోని శబ్దాలన్నిటికీ సమాధానంగా మారతావే
ఇలాంటి ఒకప్పుడు
నిన్నే తన శబ్దంగా లోకానికి వెల్లడి చేస్తుంది

మరింతకూ
శబ్దం ఆలోచనల నిశ్శబ్దమా
నిశ్శబ్దం మనసు చేసే అనంత శబ్దమా?


0 comments:

Post a Comment