నీ నిన్న లాగే
నా నేడు
తన రేపు
అదే యుద్ధం
అదే గాయం
వాళ్ళూ అంతే
మాట మార్చని నిజాయితీతో
అవే మాయనవ్వులు
అవే వాగ్దానాలు
లోకానికి మరోవైపుని
ఒక రంగుల కలగా
ఇక్కడ విరజిమ్ముతూ
ఇదింతే… ఒక వలయం
నిన్న... నేడు... రేపు...
నువ్వు... నేను... తను...
గాయాలుగా సిద్ధమవుతూ
వాళ్ళూ అంతే …
నిన్న... నేడు... రేపు...
ఒకరి వెనుక మరొకరు
గాయాలని సిద్ధం చేస్తూ
కథలన్నీ ఒక్కలానే ఉంటాయ్
వేరు వేరుగా చెప్పబడుతూ
లోకానికి మరో వైపునా
ఇదే కథ జరుగుతూ ఉంటుంది
మరో పేరుతో
ఇదే వలయాన్ని కొనసాగిస్తూ
గతమింకా కొనసాగుతూనే ఉంది
నిన్నటి నుండి నేటిలోకి
నేటి నుండి రేపటిలోకి
భవిష్యతూ తనదేనన్న గర్వంతో
భూమెప్పుడూ గుండ్రంగానే చెప్పబడుతుంది
కాలానిదీ అదే వరసేమో మరి
0 comments:
Post a Comment