ఎక్కడెక్కడి శూన్యతలు నన్నావహించిన వేళల్లో
నీ ఉనికిని పరిచయిస్తూ
నా భయాలన్నిటినీ రద్దు చేసిన నీ యంత్రాగంలో
నా ఊపిర్లన్నీ నీలోకొచ్చేసాయ్
నా ఏకాంతంలో నీదైన స్పర్శ ఒక్కటి చాలు
ఆనందానికి నాదైన నిర్వచనం ఒకటి
నీ నిర్వచనా సింధువులో బిందువవుతుంది
నా ప్రపంచాన్ని నీలో లీనం చేస్తూ
ఎప్పటికప్పుడు నిన్ను చాటాలనిపిస్తుంది
నువ్వు తెలిసాక నిశ్శబ్దం మాట్లాడుతుందని
ఒక్క నీ సన్నిధిలోనే లోకం విశాలమవుతుందని
నీ ఔన్నత్యం తరగని గని అని చెప్పాలనిపిస్తుంది
నువ్వావృతమైన ప్రతి ఏకాంతాన్ని చాటి చెప్పాలి
మరి… ఒక్క సారి ఒకే ఒక్కసారి నా ఉనికిని నాకివ్వవూ
పొంగిపొరలుతున్న ఈ నిశ్శబ్దాన్ని
నీ శబ్దంగా గానవించే ఒకే ఒక్క క్షణాన్ని అరువియ్యవూ
