ఎవరో అన్నారు…
రహస్యాన్ని
శోధించడమంటే
బాధని వేటాడి
తెచ్చుకున్నట్లే అని
“నిజమే కదా !” లోపలి నుండి చిన్నగా గుస గుస
“హే… నోర్ముయ్! శోధించక పోతే సాధించేదెలా” గదమాయించాను.
“సాధించి చేసేదేముంది. నీకు తెలియాల్సిన అవసరం ఉంటే అదే నీ కంటబడదూ?” మళ్ళీ గుస గుస
“ఇక నువ్వు ఆపు. నువ్వేం చెప్పినా నేను వినేదేలేదు.” నా రహస్యాన్వేషణని కొనసాగించాను.
బంగారు వర్ణంలో మెరిసిపోతూ కనిపించిన కాగితాన్ని చూసి “ఇదిగో… ఇదే కదూ నేను వెదుకుతున్న రహస్యం” అనుకుంటూ తెరిచి చదివాను.
“ఈ క్షణం నుండి ఏ క్షణంలో అయినా నువ్వు చనిపోతావు” రాసి ఉందక్కడ.
“రహస్యాన్ని గౌరవించి… రహస్యంగానే ఉంచాలని గట్టిగా చెప్పవద్దూ” లోపలెవరిమీదో గట్టిగా అరిచేసాను.
0 comments:
Post a Comment