దేనికి యజమానివి?

నువ్వొచ్చేవరకూ 

ఈ ప్రపంచం నీ  కోసమే వేచి ఉంది

నీకోసం ఒక నందనవనంగా 

తనను తాను సిద్ధం చేసుకున్నాకే 

నిన్ను రప్పించుకుంది 

నువ్వొచ్చావు… 

నడక నేర్చావ్ 

పరిగెత్తావ్

యంత్రమెక్కావ్

యంత్రమయ్యావ్ 

ప్రకృతికి యజమానిననుకుంటూ 

నీకు నువ్వే ప్రతిధ్వనివై 

ప్రపంచాన్ని నీకు నచ్చినట్లుగా 

ఋతువులని నీకు వీలైనట్లుగా 

సర్డుకుంటున్నావ్ 

ప్రకృతి సమతుల్యతని 

అతలాకుతలం చేస్తూ 

ఇప్పుడు

ఆ ప్రకృతేమో

తనను తాను

సమతుల్యం చేసుకోవడానికి 

తన అంతరాంతాల్లోనికి 

నిన్ను వడపోసుకుంటుంది  

మరి

ఇప్పుడు 

దేనికి యజమానివి నువ్వు?

Read More

పసి వసంతం

నాకు నన్ను చూపుతూ నువ్వు మొదలైన క్షణం

ఇంకా నా అరచేతుల నిండా ఆకాశమై పరుచుకునే ఉంది

వేవేల వసంతాలు ఒక ఉధృతమై ఒక్క సారిగా
కమ్ముకున్న సవ్వడి ఇంకా వినిపిస్తూనే ఉంది

ముద్దు ముద్దు మాటలని మూటగట్టేసి
నా మౌనాన్ని చిధ్రం చేసిన తీపి గాయం ఇంకా పచ్చిగానే ఉంది

కలల్ని మాట్లాడటం పట్టుబడని నన్ను
కలల సరిహద్దుని దాటించేసిన నీ భవిత ఇంకా పలకరిస్తూనే ఉంది

శూన్యం నను తడిమినప్పుడల్లా

నువ్వొక అలారం మోతవై నన్ను తట్టిలేపుతున్న సందర్భాలు కొనసాగుతూనే ఉన్నాయ్

నిద్రిస్తూ నువ్వు కనే కలల లేత చిరునవ్వులలో వెలిగే అమాయకత్వపు వెలుగులు

ఎప్పటికీ తరగని ఒక ఆశ్చర్యమై నన్ను కట్టేస్తున్నాయ్

నిన్ను నేను లాలించడమే అందరికీ తెలిసిన నిజం

నువ్వు నన్ను పాలించడం నాకు మాత్రమే తెలిసిన అలౌకిక ఆనందం

నవ్వుతూ తుళ్ళుతూ కళ్ళు పెద్ద చేసి నువ్వు ‘నాన్నా' అని పిలిచినప్పుడల్లా

నువ్వు యువరాణివై నన్ను ఈ ప్రపంచానికి రాజుని చేసిన ఆనందం

నీ పసి స్పర్శలో ఏ మర్మాలు దాచావో ఏమో
నా శూన్యాల అలికిడిని చెరిపేస్తూ ఒక దైవత్వం కురుస్తున్న చప్పుడు వినవడుతుంది

నీ నవ్వుల మంత్రదండంతో నా కలతలన్నిటిని సరి చేసేసి

మనఃక్లేశాలన్నిటినీ మాయం చేసేస్తున్న అద్వైత అల్లరివి

ఎప్పటికప్పుడు నన్ను కొత్తగా మొదలు పెట్టడం

ఎక్కడికక్కడ నన్నునిర్మలంగా ఆవరించుకోవడం తెలిసిన ఏకైక సత్యానివి నువ్వు

నా వంటినే మెట్లుగా నడచిన నిన్నటి నీ పసినడకల నిర్వచనాలని దాటి
నేడు నేను పరిచే దారిలో రేపటి నీ పరుగుని కలగంటూన్నా…

కన్నా… నన్ను తడిపే సున్నితపు ప్రేమ సుమాల తొలకరివి నువ్వు

నువ్వు నా ఆనందానివి… నువ్వే నా అనంతానివి…!

Read More

మధు పాత్ర...

అదిగో మధు పాత్ర...

నిండా
మంచినీరు

***

మధువు
కోసం ఎదురు చూస్తూ

ఎదురుగా
కొన్ని హృదయాలు

***

చిన్ని
చిరునవ్వుతో

కొంచెం కొంచెంగా 

వారి గిన్నెలు నింపి చూడు

***

వారి కళ్ళల్లో 

మధువుని తాగిన 

మైమరపు

***

ఆ
మైమరపు నిజం

నువ్విచ్చింది 

నీరైతేనేం

వారికది
మధువే

ఎందుకంటే 

వారి దాహం 

నీ నవ్వు

వారు
చూసిన రుచి

నువ్వు
సంపాదించుకున్న నమ్మకం

***

పదార్థానికి
రుచి లేదు

అది
పంచే మనసుకి తప్ప

Read More

ప్రణాళిక లేని కథ

ఒక కొత్త పాటని కలగంటూ 

ఆనందాన్ని కొలత వేద్దాం అనుకుంటున్నప్పుడల్లా

కాసిన్ని  అందమైన పూలని 

దాచుకున్న 

ఆ గన్నేరు మొక్క తన కాయని 

ప్రేమగా అందిస్తున్న దృశ్యమొకటి 

నా హృదయంలో

దీపశిఖలా వెలుగుతూ ఉంది 

అప్పుడు స్ఫురణకి వస్తుంది 

క్షణక్షణమూ వైకుంఠపాళి గడుల్లో 

అదృష్టాన్ని వెదుక్కునే మిథ్యాకాలమే 

జీవితమని! 

అవును… 

జీవితమంటే ప్రణాళిక లేని కథ...

గాలి పడగల క్రింద తలదాచుకున్న నీడ…

Read More

ప్రహేళిక

ఇక్కడెందుకో 

నా నడక నిశ్శబ్దమయ్యింది

విరిగి పడుతున్న నీడలని చదవటానికే 

అది తోడుగా  వస్తుందని 

లోపలి స్వరమేదో గుసగుసలాడుతుంది 

ఈ క్షణమెందుకో  

నా జీవితమంత పొడుగై  ఉంటుందనిపిస్తుంది 

కొన్ని నిగూఢతల ప్రహేళికల చిక్కులు వీడటానికి  

ఆ మాత్రం సమయం  పడుతుందని 

గుండె పొలిమేరల్లో తచ్చాడుతున్న తడి చెప్పింది 

***

హ్మ్…. 

కల చెదిరింది 

నిశ్శబ్దం ఇంకా 

కొనసాగుతూనే ఉంది   

మరి 

అసలు కలెందుకు  శబ్దం చేసిందో ! 

Read More

నిప్పుటాకు...!

నీటిలో రగులుతూ కెంజాయ అద్దుకున్న

నీలం జాబిళ్ళకి

ఇదిగో… ఇక్కడే ఇలాంటి  నిప్పుటాకు క్రింద

కాసేపు చలి కాపించాలి.

నిప్పుల కుంపటిలాంటి వేసవైతేనేం...

రగులుతున్న మంట ఉన్నప్పుడే

పసి హృదయమై కంటి ముద్రికల్లోకి

కాస్తంత చలిని తెచ్చుకోవాలి…!

సగం తెరవబడ్డ మనిషి దొరికినప్పుదు

తన ఛాతీ క్రింద చీకటిని పచ్చబొడిచిన

క్షణాలన్నిటి ఆయువునీ తోడివేసే

కళికలని ప్రతి సమయానికి అంటుగట్టాలి

మనసు పగుళ్ళ మాటున

గుండె దాచుకున్న తడి సవ్వడిని

కన్ను ఆలకించక ముందే

స్తంభించిన గాలికి మోకరిల్లైనా ఆరబెట్టెయ్యాలి

ఇష్టంగా రాసుకున్న నిశ్శబ్దం క్రింద

సేద తీరతున్న అలజడి యొక్క  అలికిడిని

రెప్పల మీద నవ్వుగా

రూపాంతరం చేయించాలి

Read More

కిటికీ !

వాన గాలి లోపలికి రాకుండా

కిటికీ తలుపులని అడ్డు పెట్టటం నేర్చుకున్నామని

గుండె తడి కంటిని తడపకుండా

గుండెకీ కంటికీ మధ్య

కిటికీ ఒకటి కావాలనుకోవటంలో

తప్పేమీ లేదు

అయితే

అసలు గుండెందుకు తడుస్తుందో చూడటానికి

ఒక్క దీపం వెలిగించటంలోనే

దిగులు ఆవిరవ్వటం అనుభవమవుతుందని  

ఏ ప్రార్థనలో నుండి వినవస్తుందో మరి !

Read More

ఆత్మధ్వని

తన ఆత్మధ్వని చుట్టూ ఆవరించుకున్న

అలౌకిక నిశ్చలతలో

మమేకమైన చలనాలన్నిటికీ చలువ పందిళ్లు వేసి

తానొక ద్వీపంగా

ఎంత సౌందర్యాన్ని రాసేసుకుందో చూడు

ఈ నిశ్శబ్దం…  

మృదువుగా చిక్కుబడిన ఏకాంతంతో తర్కిస్తూ  

అడుగు కదపని ప్రయాణంలో  

కాసేపలా తనలోకి నడవడం

ఒక దివ్యత్వపు యాత్రను చేపట్టడంలాంటిదే

నీకోసం నువ్వు రాసుకున్న కల మొత్తం

తనకు తెలుసన్నట్లుగా

నిన్ను వెచ్చబెట్టడానికి

తనలో మెరుపుల కొలిమిని సిద్ధం చేసి ఉంచుతుంది

ఇదిగో…

ఇలా నిన్ను నువ్వు గెలుచుకుని

లోలోని శబ్దాలన్నిటికీ సమాధానంగా మారతావే

ఇలాంటి ఒకప్పుడు

నిన్నే తన శబ్దంగా లోకానికి వెల్లడి చేస్తుంది

మరింతకూ

శబ్దం ఆలోచనల నిశ్శబ్దమా

నిశ్శబ్దం మనసు చేసే అనంత శబ్దమా?

Read More