Sunday, 27 November 2016

ఆ రాత్రి

ఆ రాత్రి
ఒక పరిమళమేదో హత్య చేయబడింది
లోలోని పత్రహరితమేదో
అత్యాచారానికి గురయినట్లుగా
నవ్వులన్నీ నిర్జీవమై
నిండు శూన్యంలోకి ప్రవహిస్తున్నాయి

ఒక శిశిరాన్ని పోతపోసుకుని
ఇహం లో కూరబడ్డ చీకటంతా
మనసులోకి చేరుకోవాలని పడే తపనకు
కంటి తడేదో ఇంధనమైనట్లుంది
విశృంఖలంగా తిమిరాన్నిచేరవేస్తుంది

కళ్ళకి కాటుకలా
తనకి చీకటి ఆడంబరమనుకుందేమో
మనసు తనని ముచ్చటగా హత్తుకుంటుంది
తలుపు తడుతున్న వెలుగు సవ్వడిని
ఆలకించలేనంత మైమరపుతో

అప్పుడలిగి వెళ్లి పోయిందో దీపం
లోకాన్ని వెలుగుమయం చేస్తూ


0 comments:

Post a Comment