Friday, 31 March 2017

ఆకు దాచిన చినుకు

నాకు తెలుసు నువ్వు అలసిపోయావని
ఇప్పుడు ఇదే మార్గం
రా మరి…
ఒక నిశ్శబ్దం ఆక్రమించుకున్న ఈ తోటలో  
ఆత్మైక్యమై సేద తీర


ఏటి కడుపులో దాగున్న పాటలా
ఒక మౌనపు అలజడిని హత్తుకుంటూ
దాచుకోలేనంత దగ్గరితనముందిక్కడ  
ఏకాంతపు వ్యాకరణాన్ని  
కంటి మెరుపులుగా రాయగలిగే  
హృదయ లేఖినీ ఉంది


వెలుతురుని తాగిన చెట్టు కొమ్మపై
ఆకు దొన్నెలా మారి దాచుకున్న
ఒక గోరు వెచ్చని చినుకులో  
లేచివురాకు మెత్తని వెన్నెల కాంతి
ప్రతిఫలిస్తున్న తేజస్సు మీదుగా
గాలి రాసుకొస్తుందే  ఒక చిరు పరవశం
నిన్ను పరిమళించడమే తనకు వచ్చు


ఆకాశపు అందాన్ని
నీలంగా తాగేస్తున్న సంద్రపు అంశగా
ఒక పువ్వులో నుండి నీలోకి ప్రవహిస్తుందే అనుభూతి
హృదయాన్ని తాకడం దానికి తెలుసు
దివారాత్రాల ప్రతి స్వరమూ
నీ ఊపిరి స్పర్శకై విరహపడుతున్న
ప్రణయస్వామ్యంలో
రెక్కలు విప్పుకుంటూ ఎగిరిపోతుందీ అలసట
కంటి రెప్పలకి తేనె చెమరింతలని పరిచయిస్తూ



1 comments:

భలే మార్గం కదా!!
కంటి రెప్పలకి తేనె చెమరింతలను పరిచయిస్తూ... 💘

Post a Comment