1.
మోడు వారిన చెట్టుమీద
పిచ్చిక గూళ్ళ కోసం వెతుకులాడతావేం
పరకాయించి చూడరాదూ
కువకువలేమీ లేవంటే
పక్షులు నిద్రిస్తున్నాయని కాదు
నిర్జీవమై పోయాయని
2.
ఆకలికి విలోమాలై
రాలి పడుతున్నాయి కొన్ని పండ్లు…
నువ్వు నడచిన
బంజరు కాలిబాట పక్కన
నువ్వు దాటి వచ్చిన
అన్ని క్షణాలకూ
అమరత్వం అక్షయమైంది
3.
యుగాలుగా
యుద్ధాన్ని చంపేందుకు
ఎవరూ పుట్టినట్లు లేదు
బహుశా
చంపడమెప్పుడూ
మనిషితనం కాదనేమో
4.
ఎలాంటి అబద్ధం
నిజమైతే బావుండనిపిస్తుందో
ఎప్పటికీ
దాన్ని నిజం చేసుకోలేం
ఎందుకంటే
నిజం దారి ఎప్పుడూ
అబద్ధాన్ని తాకదు
తన రంగెప్పుడూ ఒక్కలానే ఉంటుంది
0 comments:
Post a Comment