తూనీగ

మల్లెలాంటి వెన్నెలని చిలుకుతూ

ఒక వసంతాన్ని

వంటి మీదకు ఆవాహన చేసుకుంటూ

నెమ్మదిగా... నెమ్మదిగా...

అతి నెమ్మదిగా

ఒక తేలికపాటి సమీరాన్ని

నాలోకి ప్రవహింపజేస్తూ

ఇదిగో

ఇక్కడో లేత నవ్వు చప్పుడు

మృదువుగా మొదలయ్యింది

మరి మనసేమో

ఇప్పుడు ఒక తూనీగయ్యింది

జీవితమంతా మందహాసపు

మధువుతో పొంగి పొర్లుతున్న

దృశ్యాన్ని రెక్కల్లో చిత్రించుకుంటూ

Read More

కలలు అమ్మబడును

ఇక్కడ కలలు అమ్మబడును

అమ్మకానికి సరిపడా సరంజామా సిద్ధం

మీ రెప్పలకి కాసే కలలు కావివి

అంతకుమించి...

రాశులు రాశులుగా ఆకాశహర్మ్యాలు

నగరానికో విదేశాన్ని పండించే

ప్రభుత్వాల అంగట్లో కలలు అమ్మబడును

ఇక్కడ కాలం కొనబడును

మీ అరచేతుల్లోనే

అంతులేని మాటల వలలు వేసి

మోహపు పరదాలని పరచి

మీకు ఆలోచనలు చేసే శ్రమ కూడా లేనంతగా

పెట్టుబడిదారుల ముందుచూపులో

మీ కాలాన్ని ఉచితంగా కొనబడును

ఇక్కడ చిరునామాలు ఇవ్వబడును

నిన్ను నిన్నుగా నువ్వు గుర్తించేలోగానే

నీపై ఒక నటనాయకత్వం రుద్దబడును

నీకంటూ ఆశలు పుట్టేలోగానే

నీ కోరికల చిట్టా ఇదంటూ పంపిణీ చేయబడును

ఫలానా నాయకుడి అనుచరుడిగా

నీకో చిరునామా ఇవ్వబడును

ఇక్కడ తలలకి వెలకట్టబడును

మనిషికి మనిషి అపనమ్మకమై

వర్గ వైషమ్యమో జాతి శతృత్వమో కారణమై

నీ నమ్మకాలు తమ నమ్మకాలతో కలవని చోట

నువ్వొక విద్రోహివై

మానవత్వపు హద్దులు దాటబడి

నీ తలకి వెలకట్టబడును

ఇక్కడ తలరాతలు మార్చబడును

తమ ఊహలు వాస్తవాలవ్వని

సమయాలని దాటేసిన ముందు తరం

నీ ఇష్టంపై ఆత్మీయతా బంధనాలు వేసిన

జీవితపు లెక్కల్లో

తడబడిన అడుగుల నడకలలో

నీ తలరాతలు మార్చబడును

ఇక్కడ అవకాశాలంటూ

ఇంకేమీ మిగలలేదు మిత్రమా

నిన్ను నువ్వు సమాధాన పరచుకోవటానికి...

కళ్ళని తడిపే కొద్దీ

మరింత తడే ముంచేసే నేటి దృశ్యంలో

ఇప్పుడు చెయ్యవలసిందల్లా

నిన్ను నువ్వు థైర్యంగా రాసుకోవడమే !!

Read More

లిపి

నన్ను నేను చదువుకుంటున్నప్పుడు

ఆ కాగితాల నిండా

పగిలిన అద్దం ముక్కలే

ఏమి దర్పణాలో ఇవి

అంతా మాయగా...

ఒక్క నాలో

ఎన్ని' నువ్వు'లో

ఒక్కొక్క ముక్కలో ఒక్కోలా

నువ్వున్న ముక్కని చదువుకుందువురా

అర్ధం కాదని భయపడకు

ప్రతిలిపిలో విధిగా

నీకు నచ్చినట్లుగా నిన్ను రాసానులే

నిజాన్ని చదవటం కన్నా

నచ్చింది చదవటమే ఇష్టమైన చోట

రాయబడే అక్షరాలన్నీ

జీవితానికి యమపాశాలేయని తెలిసే వరకూ

నువ్వొక ఉత్తమ చదువరివే మరి

లిపిగా నచ్చకుంటేనేం

కొన్ని సంఘర్షణలు

గుండెని నులిమేసే క్షణాలు

నీపై రాయబడినప్పుడు

నువ్వొక ముగింపులేని భీతుడివే

ఒక కంచెలేని తోటగా

లోకాన్నిమృదువుగా స్పర్శింటం

అనుభూతి కావటానికి

ప్రతి లిపిలో పచ్చని నిజాన్ని చదివి చూడు

ఇకప్రతి లిప్తలో ధైర్యం పతాకమై ఎగస్తుంది

Read More

అభయముద్ర

పొగబారి మసకేసిన అస్తిత్వాన్ని

సంస్కరించజాలని బద్ధకపు సమయాల సడిలో

నేటి ఉనికి

చరిత్ర గర్భంలో శైథిల్యమవుతుందే గానీ

ఏ రాతి పుటల శాసనమవ్వదు

నీ సమయాలన్నిటినీ

ఎవరి బందీఖానాలో ఖైదు చేసుకున్నప్పుడు

పంజరమొకటి పరిపూర్ణమై

కరడు గట్టిన శూన్యం స్వేచ్ఛగా

మనసు నిండా విషాద లేఖనమవుతుంది

విషాదమే నిషాదమైన సమయంలో

ఏకాంతపు తర్కమే నికషమై

దుఃఖమాలిన్యాలన్నిటినీ అశ్రువులుగా

తర్పణం వదులుతున్న చోట

మరింత కొత్తగా మొదలవ్వటమంటే

నీకు నువ్వు శతపత్రాల కలువపు సౌందర్యమవ్వటమే

పురాణ పురుషులెవ్వరూ రక్షకి రాని తరుణాన

ఇతిహాస కథలేవీ వాస్తవమవ్వని జీవన గమనాన

నీకు నువ్వే అభయముద్రవన్న నిజంలోకి

నడవటమే నీ జీవన వికాస సూత్రం

Read More

ధూప హారతి

నిశ్శబ్దంలో కలుసుకున్న చూపులు

మౌనాన్ని ముచ్చట్లాడుకుంటున్న సవ్వడిలో

చెక్కిలికంటిన సిగ్గు పారాణి

జీవిత కాలపు పండుగలా

పరావర్తనమవుతున్న నేపథ్యంలో

ఏకత్వానుభూతి జేగంటగా మారి

ఒక అనంత గర్వాన్ని శబ్దిస్తుంటే

యుగాల కన్నీరు అవనతమై

పన్నీరే పతాకమై

పరవశాన్ని రెపరెపలాడిస్తున్న వేళ

ఒక ఏకాంతపు దైవత్వపు సమీరం

జగత్తుకి ఒక్క శ్వాసగా మారి

మెరుపెనుక మెరుపుగా

మనపై చుట్టుకోవడమంటే

దివికే ధూప హారతిగా

మనం పరిమళించడమే కదూ...

Read More

ఎక్కడ దిగి పోవాలి

ఎక్కడ దిగి పోవాలో తెలిసుండాలి

గౌరవపు వీడ్కోలు కావాలంటే

పయనంపై మోహంతో

గమ్యపు కొలత తప్పిందా

కాలమే ఎక్కడో తోసేస్తుంది

సగం రాయబడిన క్షణాలంటూ

ఏమీ లేని సమయాన

సంసిద్ధంగా ఉండాలి అనుక్షణం

కాలం మరో సారి

నిన్ను పలుచన చెయ్యకుండా

నిన్ను నువ్వు రద్దు చేసుకోవటం

నేర్చుకోనంత వరకూ

ఈ పరిమిత గాలి గోళంలో

ఎవరికీ అనుభవమవ్వని మిథ్యాదృశ్యానివై

గిరికీలు కొడుతూనే ఉంటావ్

హేతువుకందని అస్తిత్వాల వెదుకులాటలో

ఆశలకందిన కలలతో  భ్రమల పెనుగులాటలో

ప్రతి నువ్వూ ప్రతి నేనూ

ఒక అవాస్తవికతగా ఘనీభవించటం

చరిత్ర లిఖించని చైతన్య స్వరూపమే

నువ్వొక నిరాపేక్షగా రూపాంతరమైన వేళ

నిర్వ్యాపకపు సమయాలన్నిటికీ

నువ్వే చిరునామా అవ్వటముంది చూశావూ…

బంధాల బంధనాలన్నిటినీ

తెంచుకున్న స్వేఛ్చాతత్వమది

Read More

ఒంటరి పరదా

ఆశలెన్నో చిక్కుబడిపోయి

నడకలన్నీ బంధనాలై

పాదాలు మౌనం దాల్చిన చోట

కంటికందే గమ్యమొకటి

చేతికి చిక్కక ఒంటరిగా కన్నీరవుతుంది

అమరత్వానికై అర్రులు చాస్తున్న క్షణాల మోహంలో

అనుభవానికొచ్చే నవ్వులన్నీ

విమలం కాదని తెలిసే సరికే

కరిగి పోయిన సాంధ్య వర్ణమంతా

శ్యామిక పాదానికి పారాణిగా మారింది

నిద్రనివ్వాల్సిన రాత్రి

ఎడతెగని కృత్రిమ వెలుగులోకి దూకేస్తూ

తన అస్తిత్వాన్ని కోల్పోయిన చోట

కళ్ళతో కలబడిపోయిన ఆకాశపు నీలమొకటి

కన్నీటి వత్తిడితో మరింత నలుపద్దుకుని

గుండె లోతుల్లోకి దూకినట్లుంది

ఆలోచనలు మృగ్యమైన మనసు

శాశ్వతంగా ఘనీభవించింది

నిన్నటి ఏకాంతాలపై

కొన్ని ఒంటరి పరదాలని కప్పుకుంటూ

Read More

ఈసారికిలా

అలలుఅలలుగా

నువ్వు తడిమిన ప్రతి క్షణం

పరాభవించబడ్డ పాత సందిగ్ధాలన్నీ

పురాతనపు పాతరలోకి ప్రవహించేసాయ్

ఓ అరచేతి స్పర్శగానో

వైద్యం తెలిసిన మాటగానో

నీ సవ్వడి మొత్తం మనసుకి తాకుతుంటే

చీకటంతా ఎక్కడికో అశాంతిగా పయనం కట్టింది

నువ్వు పరిచయమయ్యాకే తెలిసింది

గుండెలోనూ కొన్ని కపోతాలు ఉన్నాయని

నన్ను శాంతింపచేసే ఉపశాంతి కోసం అవి

ఎర్రగా తడుస్తూ వేచి ఉన్నాయని

నువ్వూ నేనూ కలివిడిగా

నిలువెత్తు నడకలమై

లోకం దారుల్లో ఓ జీవితాన్ని

ఈసారికిలా లాగించేద్దాం ధైర్యమా…

Read More