Wednesday, 19 April 2017

అవ్యక్తపు కొలత

లోపలెవరో కదులుతున్న సవ్వడి
స్తంభించిన పుప్పొడిలా ఏదో ధ్యానం

ఒక తడచిన చీకటి గుండా
వెలుగు రథాన్ని తోలుకొస్తున్నట్లు చిన్న నవ్వు

గాలికింత మత్తును రాసి పంపినట్లు
వెదురు వేణువుని స్పృశిస్తూ ఓ మైకం !

మౌనం నిండా ఎన్ని అవ్యక్తపు కొలతలో
ప్రకృతి రాసే పద చిత్రాలని
అనుభూతుల త్రాసులో తూకమేస్తూ  

నిజమే
ఈ మౌనమింతే
తనని తెరచినప్పుడల్లా
దృశ్యాదృశ్యాల మార్మిక స్పర్శ

ఒక సుదీర్ఘ మౌనం...
మనసుని విపులీకరించే భావ నిఘంటువు
పదానికో కొత్త అర్థాన్ని లిఖిస్తూ

1 comments:

Superb Expression! You are trying to turn every one like you :)

Post a Comment