Thursday, 22 October 2015

ఇలాగే వదిలేయ్

నువ్వు తీసుకొస్తున్న ఆ కొద్ది కాంతీ
నాకు వెలుగియ్యటం ఏమోకానీ
నన్ను కాల్చేయటం మాత్రం పచ్చి నిజమనిపిస్తుంది
నువ్వు దాటి వచ్చిన తోవలన్నీ
పూల వనాలై ఉండవచ్చుగాక
నన్ను తోడ్కొని వెళితే
ముళ్ళకంపలే ఎదురేగుతాయ్
అయినా
ఎవరో కొంచెంగా మిగిల్చివెళ్ళిన నాలో
ఇంకేం ఉందనీ నీకివ్వడానికి
నాకు నేను బాకీగా మారిన క్షణాలు తప్ప
అందుకే
వెనక్కి వెళ్లి పోవూ
ఎలా ఎదురు చూడాలో ఇప్పటికే అలవాటైన వాణ్ని
చెమ్మనెక్కడ దాచుకోవాలో తెలిసిన వాణ్ని
నా పక్కగా నన్ను ప్రవహింపచేసుకోవటమే నాకెంతో బాగుంది
ఈ కన్నీటి చప్పుడు వింటూ
నన్ను ఇలాగే వదిలేయ్… ఇలాగే...


0 comments:

Post a Comment