Sunday, 26 July 2015

దగ్గరగా…

ఎదుటి గుండె 
అఖాతాల లోతుల్ని 
చదవగలిగే కళ్ళు ఉంటే బాగుండు…
చిగురుటాకు స్పర్శలా 
తాకే మనసొకటి పుట్టుకొస్తుంది 

ఒక్క తృటికాలపు చిరునవ్వే
శాశ్వత స్మృతిగా తడుముతూ  ఉన్న
మస్తిష్కపు తాత్వికతకు
అనంతంగా ఆనందాన్ని అద్ది చూస్తే 
అంతరంగం మొత్తం నక్షత్రాల సాన్నిధ్యం 

నాస్తికుడివైతేనేం 
భక్తి గీతంలోని 
భక్తిని విశ్వానికి వదిలి
తాదాత్మ్యతని మనసుకిచ్చి చూడు
అనుభూతుల వరద నిన్ను కమ్మేస్తుంది 

ధృఢత్వమొందిన మంచు బిందువుకంటే
గొప్ప వజ్రమేముంది 
ఏకాంతం ఇచ్చిన దగ్గరితనం కన్నా 
ఆత్మావలోకనానికి దారేముంది 

మనకు తప్ప అందరికీ అర్ధమయ్యే ఆనందాన్ని
మనకు మనవి చేసుకుందాం 
మనకు మనం మేలిమి అవుతూ 
పరాయి తనాన్ని పరాయి చేశాక
మిగిలేదంతా ‘మన’ తనమే... ‘మంచి’ తనమే...

0 comments:

Post a Comment