Thursday, 20 August 2015

మధుర భక్ష్యం

కాంతి శబ్దాలు చేస్తున్న నక్షత్రాల సడి
నిశ్శబ్దాన్ని వెచ్చగా శృతి చేస్తుంటే
ఓ నిరాకారం నన్ను చుట్టేస్తూ
సుదీర్ఘ శ్వాసగా  నిన్ను నాలోకి లీనం చేస్తుంటే
నిశీధాన్ని నిషేధిస్తున్న మౌనం
ఎన్ని గుసగుసలు పోతుందో తెలుసామరి

హృదయ వీధుల నిండా
మనవైన క్షణాలు నిండి పోయి
మనోలోకాన్ని చుట్టేస్తుంటే
ప్రతి క్షణానికీ కిరీటం తొడిగి
నా స్మృతుల సింహాసనంపై కూర్చో బెడుతుంటే
నేను రాజుని కానిదెప్పుడట

అలసటొకటి పెనవేసుకున్నప్పుడల్లా
నా ఏకాంతాన్ని
స్వంతం చేసుకుంటూ నువ్వొస్తుంటే
మన ఆత్మాలింగన దర్శనంతో
కొత్తబాట పట్టిందనుకుంటా
అనాధగా మారిన ఆ అలుపు

నిన్ను స్వార్ధం చేసుకున్న మొదటి క్షణం గుర్తొచ్చినప్పుడల్లా
నా భౌతికాంతరాలు వేరువడిన సవ్వడి జ్ఞప్తికొస్తూ
ఒకే భౌతికంగా మారే గుణం తనకులేదని
దేహంపై ఓ చిరుద్వేషం మొదలవుతున్నప్పుడు
మనసు నన్ను చిరునవ్విస్తుంది
మధుర భక్ష్యంగా నిన్ను రమిస్తూ


1 comments:

హృదయ వీధుల నిండా
మనవైన క్షణాలు నిండి పోయి
మనోలోకాన్ని చుట్టేస్తుంటే
ప్రతి క్షణానికీ కిరీటం తొడిగి
నా స్మృతుల సింహాసనంపై కూర్చో బెడుతుంటే ...ఎంతందంగా చెప్పారండి.

Post a Comment