Tuesday, 8 December 2015

రంగస్థలం




1.
అలపొద్దులో తిమిరపు స్పర్శ తాకుతుంటే ఎడతెగని ఆకలి మోతతో రాత్రి శబ్దం పెరిగిపోతుంటే తడి గీతాల్ని ఆలపిస్తూ తనువంతా తన్మయం నటిస్తున్ననటనాలయంలో మనసుని ఆక్రమించుకుంటున్న ఒక దుర్గంధాన్ని భరిస్తూ పూల బతుకుల్ని చిధ్రం చేస్తూ చీకటిలో బతుకుని వెదుక్కుంటూ ఒకానొక మెలకువ 2. అప్పుడెప్పుడో పనిమొదలెట్టేసిన రాత్రి తను చిక్కబడ్డాక పనిలోకి వచ్చిన వారిని చూసి కుళ్ళుకు పోయిందనుకుంటా రహదారుల మీద నుండి ఎగిరిపోతూ వారి కళ్ళలో అలా అలా కొంచెం కొంచెంగా పేరుకుపోతూ అప్పుడప్పుడూ డబ్బెక్కిన మద చక్రాల క్రిందకు వారిని తోసేస్తూ పగటి వాకిటి ముందు నెత్తుటి కళ్ళాపి చల్లి వెళ్ళిపోతుంది 3. ఉదరపోషణ ఉరుకుల్లో రాత్రికి అంటుకట్టబడ్డ జీవితంలో మనిషితనం మీద నమ్మికింకా చెదరని చెల్లమ్మనుకుంటా ఊరి బయట పొదల్లో ప్రాణం పారేసుకుంది మూతబడని కనులలో లోకాన్ని ప్రశ్నిస్తూ ఇక ఏ రాత్రినీ స్థిమితంగా నడవనివ్వక 4. పగలంతా రాత్రిలోకి ఇంకిపోవటం మొదలు పెట్టాక చీకటి కుంచె స్పర్శ కళ్ళ కాన్వాస్ పై అద్దుకుంటుంటే పాత కథలని కొత్త పాత్రలతో రంగరిస్తూ తిమిర థిల్లానాల రంగస్థలంపై ఎప్పటిలాగానే సేద తీరటం మొదలు పెట్టింది ఒక రద్దీ (రాత్రి) దృశ్యం

0 comments:

Post a Comment