శతాబ్దాల క్రితం కంచెలేసావ్
యుద్ధం కొన సా……..గుతూనే ఉంది
చెప్పుకోవటానికే యుద్ధం
నిజానికిది దండయాత్రే
అయితేనేం... ఏ దండయాత్రలో నైనా
అంతిమంగా వీరతిలకమద్దుకునేది మాత్రం మట్టే కదా
గెలిచి నిలిచినవారంటూ లేని రణరంగాన
కాలం అంచున కారుతున్న రక్తపుటేరుల కమురువాసన
ఇంకా నీకు వెగటు పుట్టించలేదనుకుంటా
ఒక చేత్తో అభయం మరో చేత్తో ఆయుధం ఇస్తూ
కృష్ణతత్వం వంటబట్టించుకున్నావ్
ఎక్కడో రగులుతున్న అగ్గిలో
నువ్వు వెలుగు కాచుకుంటున్నాననుకుంటావ్
నాకో నిజం చెప్పు నేస్తమా
ఆ వెలుగుప్పుడైనా
ఒక్క ప్రాణజ్యోతిని నిలబెట్టిన నిజాన్ని చూసావా
నీటిమీద నువ్వు గీసిన బొమ్మలెంత శాశ్వతమో
బహుశా నీకు తెలిసే ఉండవచ్చు
కాలానికి నువ్వూ అంతేనన్న నిజం కూడా స్ఫురించనంత
జ్ఞానత్వంతో మిడిసి పడకు మిత్రమా
నీలో నువ్వు శలభంలా కొట్టుకులాడే రోజొకటి వచ్చేస్తుంది
క్లిష్టమైనచోట కాస్తంత కోల్పోయి చూడు
నువ్వెంత ఇష్టమవుతావో నీకే తెలుస్తుంది
కంటి చివర కొన్ని వెచ్చని చినుకులు తడిమితే కదా తెలిసేది
ప్రతి తేమలో ఒక హాయి ఉంటుందని
నీకు నువ్విచ్చుకునే ఒకానొక అద్భుతమైన కానుక తానని
0 comments:
Post a Comment