Wednesday, 2 March 2016

నేతి నైవేద్యాలు


దేవుడున్నాడన్న నమ్మకమే భూషణమై
గుళ్ళో భోషాణాలు నింపుతూ ఆస్తికులు
లేడన్న నమ్మకమే పునాదిగా
రుజువు చూపితే కోట్లు ఇస్తామంటూ నాస్తికులు

రాతి బొమ్మలకి రంగురాళ్ళ ఉంగరాల నజరానాలు
నిశ్చల విగ్రహాలకి నేతి పరమానన్నపు నైవేద్యాలు
భావజాలపు నమ్మకాలకి జేజేలు
రుజువు చూపితే చాలట నోట్లకట్టలు

నమ్మిన భావం నిప్పులపై నడిపిస్తే
నమ్మని తనం సభలూ, సమావేశాలు
నమ్మకాల బజారులో అందరిదీ వ్యాపారమే
ప్రాణాల లెక్కల తకరారుతో
తమకొరిగేదేదీ లేనప్పుడు
వారికి మాటలే ముద్దవుతూ ఉంటాయ్
చేతలెందుకు చెత్త అనిపిస్తూ

మనిషి ఉన్నాడనేది జగమెరిగిన సత్యమే కావచ్చు
మరి మనిషికి మనిషి ఉన్నాడన్నది మిథ్యేకదా
ఓ వంతు ఎండిన డొక్కలతో
రెండొంతులు అర్ధాకలితో ఉంటున్న జగానికి
రంగురాళ్ళ ఉంగరాల అవసరం లేదు
తిన్నా అరగని ఆ నేతి నైవేద్యాలు వారికొద్దు
మనఃశాంతి పోగొట్టే నోట్ల కట్టలసలే వద్దు
నోట్లో కి నాలుగు వేళ్ళు వెళ్ళే సాయమే ముద్దు

ఎండిన డొక్కల సాక్షిగా
కుప్పతొట్టెల సాక్షిగా
ఆకలి సాక్షిగా
ఒక్క ముద్ద
ఒక్క ముద్ద చాలు.
ఒకే ఒక ముద్ద సాయం చాలు
అదే దైవత్వం…
నిజమైన మనిషితత్వం

0 comments:

Post a Comment