Saturday, 2 January 2016

పట్టా


ఏదైనా రాయాలిప్పుడు
అవును.. 
ఏదైనా సరే రాయాల్సిందే 

మనసు కదలకపోయినా 
చేతుల కదలికలు యాంత్రికమవ్వాలి 

జీవన పంజరంలో బతికేస్తూ 
పావురపు స్వేచ్ఛ గురించి 
అక్షరాలని రెక్కలకి కట్టి అలా అలా ఎగరవెయ్యాలి

నవ్వు మెదలక పోయినా
పెదాలు విడివడాలి 

తడి అద్దుకోకున్నా
కంటి చుక్క చెక్కిలి దాటాలి 

సంతోషాన్నెప్పుడూ 
దుఃఖంతో మచ్చిక చేసుకోవాలి 

మనసుకీ  మనసుకీ మధ్య 
ఎడారులు కొన్ని పరచుకోవాలి 

యుద్ధమే కాదు 
యుద్ధరంగమూ నీదై ఉండాలి

అస్థిత్వపు అర్ధాన్ని వ్యర్ధపరచుకుంటూ 
మేధావిగా మారి లోకానికి నీతులు నేర్పాలి 

ఎక్కడికక్కడ అప్పటికప్పుడే
కొనుగోలుదారునిగానో, అమ్మకందారునిగానో 
ద్విపాత్రాభినయం చెయ్యాలి

నీ రహితంగా నువ్వు బతకాలి లోకరీతిని కౌగిలిస్తూ
పట్టాపొందాలి నవమానవుడిగా పట్టాభిషిక్తుడవౌతూ.. ప్రకృతినిఆటకాయిస్తూ !

0 comments:

Post a Comment