Friday, 10 June 2016

ఈసారికిలా



నలిగి పోయిన నిన్నటి వేళలని
పలకరించినప్పుడల్లా
అవి నీకోసం ఎంతగా నిరీక్షించాయో
లెక్కే కుదరలేదు

అనుక్షణం జీవితాన్నిఅల్లాడిస్తున్న
కొన్ని ఆగంతక శబ్దాలకి దూరంగా జరుగుతూ
మిణుగురంత ఆశని ఉగ్గబట్టుకుని
కాంతి సముద్రాన్ని కలగన్నానిన్నాళ్ళు

అలలు అలలుగా కలలని దాటేస్తూ
నువ్వు తడిమిన ప్రతి వాస్తవ క్షణం
పరాభవించబడ్డ పాత సందిగ్ధాలన్నీ
పురాతనపు పాతరలోకి ప్రవహించేసాయ్

ఓ అరచేతి స్పర్శగానో
వైద్యం తెలిసిన మాటగానో
నీ సవ్వడి మొత్తం మనసుకి తాకుతుంటే
చీకటంతా ఎక్కడికో అశాంతిగా పయనం కట్టింది

నువ్వు పరిచయమయ్యాకే తెలిసింది
గుండెలోనూ కొన్ని కపోతాలు ఉన్నాయని
నన్ను శాంతింపచేసే ఉపశాంతి కోసం అవి
ఎర్రగా తడుస్తూ వేచి ఉన్నాయని

నువ్వూ నేనూ కలివిడిగా
నిలువెత్తు నడకలమై
లోకం దారుల్లో ఓ జీవితాన్ని
ఈసారికిలా లాగించేద్దాం ధైర్యమా !!!




0 comments:

Post a Comment