Friday, 23 September 2016

ప్రకరణం



నీలోని ఔన్నత్యాల జాడ తెలిసే వరకూ
ఒక జీవన విధ్వంసం
పరాచకాలాడుతూనే ఉంటుందక్కడ
నీ రోజుకి తానింకా మకుటధారినేనని

నీకు నువ్వు ఒక్క సుషుప్త గుహగా
కొనసాగుతున్న అతి నిశ్శబ్ద గాఢ నిద్రలో
చీకటొక ప్రగాఢ ప్రకరణంగా
రాయబడ్డ చోట
నిర్వ్యాపకంగా ఉందనిపించే
ప్రశాంత వాక్యమొక్కటి మళ్ళీ మళ్ళీ
కళ్ళకి గాలమేస్తుంటే తెలిసింది
మనమంటూ వెతకం కానీ
సమస్యతో పాటుగానే సమాధానమూ
ఛాయలా వెన్నంటి ఉంటుందని

నీలం చీరపై తెల్లపూల వరసలా
కదం తొక్కుతున్న నక్షత్రకేళి చుట్టూ
ఎంత శూన్యం కప్పబడి ఉంటేనేం
దిగంతాలను దాటుకుంటూ వచ్చి
నీ కళ్ళని వెలుగై చుట్టుకోవడమే
విశ్వం రాసిన ధనాత్మక కవిత్వమనిపించటం లేదూ

ఓరిమి కొనసాగింపుతో
ఓటమి నిష్క్రమించడం
గాయాల లేపనంగా
గెలుపు అరుదెంచడం
పరిచయించే పాఠమొక్కటే

నువ్వున్నచోటే
నీ నీడ ఉంటుందని
ఋణాత్మకమున్న చోటే
ధనాత్మకపు మోహరింపన్నది
ప్రకృతి రాసిన వ్యూహాత్మకపు నమ్మకమని


0 comments:

Post a Comment