Sunday, 4 September 2016

చీకటి సమయం



రజిత కాంతి ఉన్నంత వరకూ
నిశి గాఢతపై మనసవ్వని జీవితాన
వెలుగుని చదవాలంటే
చీకటి పుస్తకం తెరవాల్సిందేనన్న నిజం
ఎంత మంది ఎన్ని రకాలుగా చెప్తేనేం
ఎలాంటి శబ్దాలని స్వీకరించని నాకు
కళ్ళ నిండా భ్రమలే చూపు చేసుకున్నాక
మెరుపుల మోహంలో రెప్ప విప్పితే
జీవితం ఏకవర్ణమవుతుందన్న సంగతి
వ్యక్తమయ్యింది

ఇప్పుడేమో
కోసుకోవటానికి వెన్నెల లేనంత సేపు
నింపాదిగా నడవాలని ఉంది ఒక రాత్రిలో
చీకటి సుమాలని ఆఘ్రాణిస్తూ !!

మరి దేని సమయాలు దానికైతేనే కదా
ప్రకృతి కవిత్వమై పోయి
నన్ను మనిషిగా విస్తరించేసేది

0 comments:

Post a Comment